قلت اما اشوف اللى حصل ..بصراحه جذبنى العنوان قوى .. قلت يمكن الاعضاء المصريين والاسرائيليين عمالين يبعتوا لبعض رسائل تهديديه ولا حاجه زى كده لا قدر الله وخاصة ان الفيس بوك مساوئه بدأت تظهر من ناحية انتهاك سرية – المعلومات الشخصيه – اللى بيقدمها الاعضاء بمزاجهم

اتفاجأت بان الخبر بيقول فى سطرين اتنين:

يشهد موقع الفيس بوك حاليا حربا ضروسا بين شباب مصريين وآخرين صهاينة بسبب قيام الشباب المصري بإنشاء غرفة على الموقع لمناصرة حركة حماس بينما أنشأ شابان صهيونيان غرفة على نفس الموقع لمناصرة مستعمرة سديروت الصهيونية الموجودة في الجنوب الإسرائيلي والتي توجه حركة حماس لها قصفا متكررا …

يا حلاوه يا ولاد ..هى دى الحرب فعلا ولا بلاش .. شوية عيال عاملين جروب للأهلى على الفيس بوك يشتموا فيه الزمالك راح شوية عيال زملكاويه بجروب يشتم فى ام الاهلى.. كده قامت حرب ضروس بين الاهلويه والزملكاويه!!

يا جدعان ده كل حاجه دلوقتى اتعملها جروب على الفيس بوك من جروب لتأييد بوبى جوليا ملكة القلوب بتاعت قناة مولتى لحد جروب للناس اللى بتحب تنام على الارض والناس اللى بتعارض عدم الحركه وانت واقف على السلم الكهربائى

انا نفسى افهم مين صحفى عنده معرفه بابجديات الصحافه يكتب خبر بالشكل ده فى جريده المفروض انها مصدر جاد للأخبار ..ده كويس انه مكتبش اسمه على ” الخبر”

كابتن كابتن.. على فكره اسمها جروبات اى مجموعات وليس غرف.. الغرف تجدها فى البالتوك يا اخى كما تجدها فى بيتكم بالتأكيد

قلت لازم اتبع نظام غذائى سليم بلاش العشوائيه فى الريجيم من نوعية الحرمان من الأكل و تجويع النفس لانه نظام فاشل قلت اما اعمل شوية بحث على الانترنت .. بصراحه لقيت معلومات مفيده جدا و انظمه غذائيه صحيه ممتازه لكن اللى غاظنى حاجه واحده بس .. ان الكل بيوجه الكلام الى النصف الحلو بس .. كل موقع ادخله الاقى معلومات قيمه ولكن لهجة الخطاب موجهه الى الانثى فقط .. طب ليه ؟؟ اشمعنى يعنى؟؟

هو الستات بس هم اللى بيحبوا يعملوا ريجيم؟؟ اكيد لأ طبعا فى الاف الرجال كمان عاوزين يخسوا شويه و بيدوروا على مواقع تفيدهم فى التخسيس … اكيد حاجه تغيظ قوى لما تلاقى ان الكلام كله من نوعية “عزيزتى المرأه من اجل ريجيم ناجح من فضلك سيدتى اتبعى الاتى….!! “

فى اوروبا و الدول المتقدمه دلوقت بيكتبوا فى المراجع والكتب العلميه لما يوجهوا الخطاب الى القارىء .. بيوجهوه بصيغة الذكر والانثى من نوعية “him or her” او “he or she” على الرغم من كده الاقى ان حتى المواقع الاجنبيه تخاطب اللى عاوزين يعملوا ريجيم بصيغة الانثى فقط .. طب اشمعنى دى بالذات؟!!!!